நீட் யாருக்கான நுழைவுத் தேர்வு 5

தமிழக அரசுப் பாடத் திட்டத்தைப் பற்றி என்ன நினைக்கிறீர்கள்?

சரியில்ல சார், சிபிஎஸ்சி சிலப்பசை ஒப்பிடும் போது இது ஒன்னுமே இல்லை.

எந்த விசயத்தில் சரியில்லைன்னு நினைக்கிறீங்க?

சிபிஎஸ்சி சிலபஸ் காலேஜ்ல படிக்கிற மாதிரி. அவ்ளோ கன்டென்ட் அதுல இருக்கு. அதுல படிச்சா நாலேஜ் நல்லா வளரும் சார். நம்ம ஊர் சிலப்பஸ் எல்லாம் சும்மா. சிபிஎஸ்சில பாதிதான் நம்ம ஊர் சிலப்பசே இருக்கு. இதை படிச்சு எப்படி சார் நம்ம பையன் அறிவு வளரும்.

பெரும்பாலும் இந்த மாதிரியான உரையாடல்களை தினமும் நீங்கள் ஒரு முறையாவது கடந்திருப்பீர்கள்.

மாணவர்களுக்கான அறிவு என்பது எவ்வளவு கடினமான பாடத்திட்டத்தில் தான் இருக்கிறது என்ற ஒரு பொது புத்தி மிக ஆழமாக நம் மக்களிடம் வேரூன்றிப் போயிருக்கிறது.

ஆனால் அதே நேரம் அந்த கல்வியினை பெறுகிற மாணவர்களின் பொருளாதார பின்புலம், குடும்ப சூழல், சமூக வாழ்வியல், புவிசார் சிக்கல்கள் என அனைத்தும் ஒரே சம நிலையில் இருக்கிறதா என்று யாரும் யோசிப்பதில்லை.

எது எப்படியோ, கடந்த வாரம் ஒன்றிய அரசின் மனித வள மேம்பாட்டுத் துறையின் அமைச்சர் பிரகாஷ் ஜவடேகர் எதிர்வரும் 2019 கல்வி ஆண்டில் இருந்து சிபிஎஸ்சி பாடத்திட்டத்தினை பாதியாக குறைக்கச் சொல்லி தேசிய கல்வி ஆராய்ச்சி மற்றும் பயிற்ச்சி கழகத்திடம் (NCERT) பரிந்துரைத்துள்ளதாக பேட்டி அளித்துள்ளார்.

அப்படியானால் அந்த பாடத்திட்டம் தமிழக அரசின் தற்போதைய பாடத்திட்டத்தின் அளவுதான் இருக்கும் என்று நாம் பொருள் கொள்ளலாம்.

என் கவலை எல்லாம் இதுநாள் வரை சிபிஎஸ்சி தான் உசத்தி என வகுப்பெடுத்த கூட்டம், மாநில பாடத்திட்டமும் சிபிஎஸ்சி பாடத்திட்டமும் ஒன்றாக இருக்கப் போவதை எந்த அளவுக்கு ஜீரணிப்பார்கள் எனத் தெரியவில்லை.

அவர்கள் அனைவரும், இன்டர்நேசனல் சிலப்பசுக்கு மாறுவதற்கு என் வாழ்த்துகள்.

சரி ஏன் இந்த திடீர் மாற்றம்?

நீட் தேர்வில் கடந்த வருடம் சிபிஎஸ்சி பாடத்திட்டத்தில் பயின்ற மாணவர்கள் தமிழக மாநில அரசின் பாடத்திட்டத்தில் பயின்ற மாணவர்களை விடவும் குறைவாக தேர்ச்சி பெற்றனர். இதற்கு காரணம் அவர்களுக்கு இருக்கும் மிக அழுத்தமான பாடத்திட்டமே என்ற அரிய உண்மையினை கண்டுபிடித்துள்ளார்கள். ஆகவேதான் இந்த திடீர் மாற்றம்.

மேலும், இனி மாநில பாடத்திட்டமும், சிபிஎஸ்சி பாடத்திட்டமும் ஒரே அளவில் இருப்பதன் மூலம் எல்லா மாநிலத்திலும் சிபிஎஸ்சி பாடத்திட்டத்தையே நடுத்தர வர்க்கம் ஓஹோவென ஆர்பரித்து ஆதரிக்கும்.

இதன் வாயிலாக மொழித்தாளுக்கு கட்டாயமாக இருக்கும் தமிழ் போன்ற மாநில மொழிகளை மெல்ல காயடிக்கத் துவங்குவார்கள். பத்து வருடங்களில் தமிழகத்தில் மட்டுமல்ல ஒட்டு மொத்த இந்தியாவிலும் அவரவர் தாய்மொழியினை எழுதத் தெரியாத ஒரு பெரும் கூட்டம் உருவாகும்.

அப்படியானால் சிபிஎஸ்சி பாடத்திட்டமே கூடாதா?

முதலில் சிபிஎஸ்சி பாடத்திட்டம் எதற்கு கொண்டு வந்தார்கள். எங்கு கொண்டு வந்தார்கள் என்று லாஜிக்காக யோசித்தாலே அதற்கான எல்லை எது என எளிதாக புரியும்.

மற்றபடி மாநில அரசுகளின் பாடத்திட்டத்தினை முன்னுதாரணமாகக் கொண்டு சிபிஎஸ்சியில் பயிலும் குழந்தைகளின் பாடச்சுமையினை குறைக்க முன் வந்த மத்திய அரசுக்கு வாழ்த்துகள்.

தமிழகத்தில் பத்து பைசா இன்வெஸ்ட் செய்யாமல், ஒரு புதிய மருத்துவக் கல்லூரிகளையும் இந்த வருட பட்ஜெட்டில் ஒதுக்காமல் நம்மிடம் இருந்த சீட்டை மட்டும் தெளிவாக நகர்த்திக் கொண்ட தந்திரம் தான் நீட்.

மீண்டும் முதலில் இருந்து நீங்கள் எங்கே ஏமாந்தீர்கள் என்று யோசித்துப் பாருங்கள், அதன் துவக்கப் புள்ளி சிபிஎஸ்சி பாடத்திட்டம்தான் அதிசிறந்தது என்று உங்களை நம்ப வைக்கப்பட்டதில் போய் முடியும்.

இனியாவது நீட் தேர்வு வேண்டுமா என யோசியுங்கள்.

#TNagainstNEET

ஹோலிப் பண்டிகையும், ஆபத்தான வண்ணப் பொடிகளும்

ஹோலி கொண்டாட்டத்தில் இப்போது எந்த மாதிரியான கலர் பொடிகளை பயன்படுத்துகிறார்கள் என தெரியவில்லை.

மேலோட்டமா தேடினால் மஞ்சள், குங்குமம் என நெஞ்சை வருடுகிறார்கள்.. ஆனால் சிந்தடிக் பாலிமர் சார்ந்த பொருட்களை வண்ணப் பொடிகளாக பயன்படுத்துவதாக சமீபத்திய ஆய்வறிக்கைகளும், சில முன்னனி இதழ்களும் கவலை தெரிவிக்கின்றன.

இந்தியாவில் ஒரு கல்யாண குணம் இருக்கிறது. எதை வேண்டுமானாலும் உடைத்துப் பேசலாம், மதம், இனம் சார்ந்த நம்பிக்கைகள், விழாக்கால கொண்ட்டாங்களிலினால் ஏற்படும் சுற்றுப் புறச் சூழல் சீர்கேடுகளை பேசினால் அசல் சிக்கலை விட்டு விட்டு தீமைகளை சுட்டிக் காட்டுபவனை காட்டடி அடிப்பார்கள்.

இத்தையக நச்சு வண்ணப் பொடிகள் நேரடியாக உடலில் படும் போதோ தோல் அரிப்பு வியாதிகளும் வரும் என எச்சரிக்கிறார்கள். இவ்வாறு பாதிப்படையும் தோல் வழியாக உடலுக்கு தீங்கு விளைவிக்கு நச்சுத் தனமை உடைய தனிமங்கள் எளிதில் செல்லவும் இது வழி வகுக்கும்.

இதை விட சிக்கல் இந்த நச்சு வண்ணப் பொடிகள் நேரடியாக நீரில் கலக்கும் போது கிட்டதட்ட சாயப்பட்டறை கழிவு நீரை நீர் நிலைகளில் கலக்கும் போது என்ன கேடு விளையுமோ அதற்கு குறைவில்லாத பாதிப்பையே சுற்றுப் புற சூழலில் ஏற்படுத்தும்.

ஒரு சிறிய உதாரணத்தை இங்கே ஒப்பிட வேண்டுமென்றால், வீட்டில் துணி துவைக்கும் போது துணிகளில் இருந்து வெளியேறும் சாயத்தின் அளவை விட பல மடங்கு அதிக அடர்த்தியுடன்உடனடியாக நீர் நிலைகளில் இது கலக்க வாய்ப்பு அதிகம். மேலும் சிக்கலான மூலக்கூறு வடிவமைப்பில் இருக்கும் வண்ணப் பொடிகளை மட்கச் செய்வதோ சுத்திகரிப்பு செய்வதோ மிக கடினமான செயல்.

தற்போது தலைகீழ் சவ்வூடு பரவல் (Reverse Osmosis) நுட்பம்தான் சாயப்பட்டறை கழிவுகளை சுத்திகரிக்க பயன்படுகிறது. ஆனால் ppm (Parts per million) அளவுக்கு இதனால் சுத்திகரிக்க முடியாது. அந்த வகையில் இது போன்ற கொண்டாட்டங்களில் சிந்தடிக் பொடி வகைகள் ஆபத்தானது.

http://www.dailymail.co.uk/indiahome/indianews/article-2299521/Holi-colours-toxic-environment-report-finds.html

https://cen.acs.org/articles/96/i9/Holi-colors-gives-vibrant-hues.html

பிரெகன் மலை ரயில்வே (Brecon Mountain Railways)

வேல்ஸ் தேசத்தில் மிகப் புகழ் வாய்ந்தது பிரெகன் மலை ரயில்வே (Brecon Mountain Railway). ஒரு மீட்டருக்கும் குறைவாக 0.60 மீட்டர் அகலமுடைய  இருப்புப் பாதையில் ஓடும் இந்த இரயில் நீராவி இயந்திரத்தால் இயக்கப்படுகிறது. பிரெகன் மலை இரயில் பென்ட் (pant) என்னும் இரயில் நிலையத்தில் இருந்து, டொர்பன்டா (Torpantau) என்னும் பள்ளதாக்கு வரை 7 கி.மீ நீளத்திற்கு பயணிக்கிறது. இவ்விரு நிலையங்களுக்கு இடையில் பான்ட்ஸ்டிசில் (Pontsticill) இரயில் நிலையம் உள்ளது. இதன் அருகில் தான் வேல்சின் மிகப்பெரிய நீர்த்தேக்கங்களில் ஒன்றான பான்ட்ஸ்டிசில் நீர்த் தேக்கம் உள்ளது. 

ஏறத்தாழ பென்ட் இரயில் நிலையத்தில் இருந்து 25 நிமிடம் பயணித்தால் டொர்பன்டா பள்ளதாக்கின் உச்சியை அடையலாம். உடலை உறையச் செய்யும் குளிர் நிலை இருந்தாலும் நல்ல சூரியம் வெளிச்சம் இன்று இருந்ததால் பள்ளதாக்கில் இருந்து வரும் குளிர் காற்றை அனுபவித்தபடி சிறிது நேரம் நின்றேன். தூரத்து மலை முகட்டில் மேய்ந்து கொண்டு இருக்கும் கம்பளி ஆடுகள், இடையில் நீர் தேக்கம் என பார்ப்பதற்கே மிக ரம்மியமான பகுதி இது. 

மேலும் இப்பகுதி வேல்சு தேசத்தின் மிகப்பெரிய தேசிய பூங்காக்களில் ஒன்றான பிரெகன் பிகான் தேசிய பூங்காவின் (Brecon Beacons National Park) தெற்கு பகுதியில் அமைந்துள்ளது. ஆகையால், பிரித்தானியாவிற்கு சுற்றுலா வருபவர்கள் இந்த பகுதியில் இரண்டு நாள் தங்கி  பிரெகன் பேகான் தேசிய பூங்காவினை நன்கு சுற்றிப் பார்க்கலாம்.

Brecon Mountain Railway ticket office, Pant station.

Pontsticill Reservoir 

Torpantau station

Torpantau station

Torpantau station

Torpantau station

Pontsticill Reservoir 

Torpantau station

பாக்டீரியா தொற்றும் அதன் தகவமைப்பும் (Antimicrobial resistance)

பாக்டீரியாவின் தாக்குதலில் இருந்து மனித உயிர்களை காக்கும் பணியில்  ஆன்டிபயாட்டிக்கின் (antibiotic) பங்கு இன்றியமையாதது. இதன் வரலாறு 1928 ஆம் ஆண்டு பிரித்தானியாவின் ஸ்காட்லாந்து தேசத்து அறிவியலாளர் மருத்துவர் அலெக்சான்டர் பிளெமிங் ( Alexander Fleming) என்பார் கண்டுபிடித்த பென்சிலினில் (Penicillin) இருந்து துவங்கியது. இன்றைக்கு சந்தையில் அனுமதிக்கபப்ட்ட ஆன்டிபயாடிக் மற்றும் அதன் அடிப்படை தகவலை பிறிதொரு பதிவில் விளக்கமாக பார்ப்போம்.

ஒரு குறிப்பிட்ட பாக்ட்டீரியா தொற்று நோய்க்கு ஆன்டிபயாடிக் மருந்து தரும் போது குறிப்பிட்ட கால இடைவெளியில் பாக்டீரியா தன்னை இந்த மருந்தில் இருந்து தப்பித்து கொள்ளும் உத்தியினை  (survival) தன்னுள்ளே வைத்துள்ளது. இதன் தகவமைப்பு உத்திகள் நான்கு வழி முறைகளில் நடைபெறுகிறது. அதில் முக்கியமானது அரைகுறையாய் கொல்லப்படும் பாக்ட்டீரியா  கிருமிகள் அருகில் இருக்கும் ஆரோக்கியமான கிருமிகளுக்கு இத்தகவலை அனுப்பி விடுகின்றன. பிறகு என்ன, அந்த பாக்டீரியாவின் மரபணு அளவில் சில மாற்றங்களை ஏற்படுத்தி  (Conjugation) எளிதில் ஆன்டிபயாடிக் மருந்துகளிடம் இருந்து தப்பித்து விடும்.

ஆகையால் ஒரு ஆன்டிபயாடிக் மருந்து குறிப்பிட்ட வருடங்களுக்கு மேல் தீவிரமாக பாக்டீரியாவின் தகவமைப்பினை எதிர்த்து செயலாற்ற இயலுவதில்லை. 

அப்படியானால், ஆன்டிபயாடிக் எடுத்துக் கொள்ளாமல் இருந்தால் என்ன ஆகும். பாக்டீரியாவில் தொற்றை பொருத்து அவை உடலினுள் பரவும் வேகத்திற்கு தக்க மனிதன் உயிரை விட வேண்டி வரும். அம்மா, ஆயா வைத்தியம் என்று பலரும் கை வைத்தியம் செய்து கொண்டே பல தீவிர பாக்டீரிய தொற்றுகளின் விபரீதம் தெரியாமல் உயிரை விட இதுவும் ஒரு காரணம்.

என்னடா கொடுமை இது. ஆன்டிபயாடிக் எடுத்தாலும் பாக்டீரியா தப்பித்துக் கொள்கிறதே என யோசிக்க வைக்கிறது அல்லவா?

ஆம், பாக்டீரியாக்களும் மனிதர்களைப் போலவே மிகத் திறமையானவை. தன்னை ஒவ்வொரு கால கட்டத்திற்கும் தகுந்த வாறு தகவமைத்துக் கொள்வதில் அதி புத்திசாலி. குறிப்பாக ஆன்டிபயாடிக் மருந்துகளுக்கு எதிராக பாக்டீரியாக்கள் எதிர்ப்பு ஆற்றலை பெறுவதை ஆன்டிமைக்ரோபிய ரெசிஸ்டன்ஸ் (antimicrobial resistance)  என்று அறிவியல் உலகம் அழைக்கிறது. இங்கே மைக்ரோப்ஸ் (microbes) என அழைக்கப்படுவை பாக்டீரியாக்களோடு சேர்த்து, பூஞ்சைகள், வைரஸ்கள், ப்ரோட்டிஸ்ட்டுகள் என பலவகை கிருமிகள் சேர்ந்ததுதான். 

மனித உடலுக்குள் ஏற்படும் ஆன்டிமைக்ரோபியல் ரெசிஸ்டன்சை எப்படி குறைக்கலாம். ஒரு மருத்துவர் உங்களுக்கு மூன்று நாளைக்கு ஆன்டிபயாடிக்  மருந்துகளை பரிந்துரைத்தால் குணமாகினாலும் மருந்துகளை முழுச் சுற்று முடியும் வரை மருந்தினை எடுத்துக் கொள்ளுங்கள். அரைகுறையாய்,  நோய் முற்றிலும் குணமாவது தெரியாமல் இடையிலேயே மருந்தினை நிறுத்தினால், அடுத்த முறை அதே பாக்டீரியா தொற்று மிக வீரியத்துடன் தாக்கும் போது முன்பு கொடுக்கப்பட்ட ஆன்டிபயாடிக் மருந்து வேலை செய்யாது. 

ஆகவே மருத்துவர் பரிந்துரைக்கும் மருந்துகளை முழுச் சுற்றுக்கும் எடுத்துக் கொள்ளுங்கள். மற்றொன்று நீங்களாகவே கூகுளிலோ அல்லது நண்பர்களுக்கு தரப்பட்ட மருந்து பரிந்துரையினையோ எடுத்துக் கொள்வது, அல்லது மெடிக்கலுக்கு சென்று நீங்களாகவே மருந்து வாங்கி உண்பதை தயவு செய்து நிறுத்துங்கள்.  இதுவும் ஆன்டிமைக்ரோபியல் ரெசிஸ்டன்ஸ் அதிகரிக்கும் காரணிகளில் இதுவும் ஒன்று.

சரி நான் சொல்ல வந்த விசயத்துக்கு வருகிறேன்.

இந்தியாவின் பொதுச் சுகாதாரத்தில் (public health) இன்று வரை சவாலாக இருப்பது திறந்த வெளியில் மலம் கழிப்பது  (open defecation). குறிப்பாக திறந்த வெளியில் மலம் கழிக்கும் போது ஏற்படும் பாக்டீரியா தொற்று அச்சூழலில் வசிக்கும் அனைவரையும் மிக மோசமாக பாதிக்கக் கூடியது. மேலும் இவை அச்சூழலில் மிக வலிமையோடு எதிர்ப்பு சக்தி  (resistance) பெறுவதால் இவற்றினை அழிப்பதும் கடினம். எளிய வார்த்தையில் சொல்லப் போனால் மிக மோசமான ஒரு வெடிகுண்டை ஒவ்வொரு நாளும் திறந்த வெளியில் வெடிக்க வைக்கிறீர்கள்.

இந்த மைக்ரோப்சுகள் நீர் நிலை, குடி நீர் தேக்கிகளில் கலக்கும் போது பல்வேறு வியாதிகளை உண்டு செய்பவை. பிறகு இதனை அழிக்கவல்ல தீர்வு ஒன்றினை பெறுவது என்பது மிகக் கடினம்.

மீண்டும் மீண்டும் ஏன் சொல்கிறேன் என்றால், 1928 ஆம் ஆண்டு தொடங்கி நூற்றுக்கும் மேற்பட்ட ஆன்டிபயாடிக் மருந்து வகைகளை இயற்கை, மற்றும் செயற்கை வேதி பொருட்களை கொண்டு மருந்துலகம் வடிவமைத்து இருந்தாலும், 1987 ஆம் ஆண்டிற்கு பிறகு புதிய வகை ஆன்டிபயாடிக் மருந்துகளை வடிவமைக்க இயலவில்லை. காரணம் ஆன்டிமைக்ரோபியல் ரெசிஸ்டன்ஸ் என்னும் காரணி.

ஆகையால், திறந்த வெளியில் உங்கள் பகுதியில் மலம் கழிக்கும் வழக்கம் இருக்குமானால் அருகில் இருக்கும் பஞ்சாயத்து, பேரூராட்சி, நகராட்சி, மாநாகராட்சி சுகாதாரத்துறை மூலம் இதனை நிறுத்த வலியுறுத்துங்கள்.

இந்த தளத்தில் அரசு சாரா தன்னார்வ தொண்டு நிறுவனங்களின் சேவை மிக முக்கியமானது. 

உலக சுகாதார நிறுவனத்தின்  (World Health Organisation) அறிவுறுத்தலின் படி உலகை எதிர் நோக்கி இருக்கும் மிகப் பெரிய அச்சுறுத்தல் ஆன்டிமைக்ரோபியல் ரெசிஸ்டன்ஸ்  என்னும் காரணிதான். இது எந்த தேசம், வயது, பாலினம் என எதையும் பார்க்காது தாக்கும் வல்லமை கொண்ட பாக்டீரியாக்களை உருவாக்க வல்லது.

ஆகவே இவ்விசயத்தில் அரசு, பொதுமக்கள், தன்னார்வ தொண்டு நிறுவனங்கள், மருத்துவர்கள், அறிவியலாளர்கள் என எல்லோரும் ஒரு குடையில் கீழ் இயங்கி ஆன்டிமைக்ரோபியல் ரெசிஸ்டென்ஸ் சிக்கலுக்கு எதிராக நின்று போராடுவோம்.

குறிப்பு:

தயவு செய்து இந்தப் பதிவில் மரபு வழியாக எதையாவது செய்கிறோம் என உளற வேண்டாம். இவை நம்பிக்கை சார்ந்த பதிவு அல்ல, முழுக்க முழுக்க உலகமே எதிர் நோக்கி இருக்கும் சுகாதார பிரச்சினை. 

சானிட்டரி துறையில் பணி புரியும் என் ஜி ஓக்கள் யாரேனும் இருந்தால் என்னை தொடர்பு கொள்ளவும். பிரித்தானியா, இந்தியா கூட்டு ஆராய்ச்சியில் இந்த தளத்தில் ஆய்வுப் பணி செய்ய பல தகவல்களை சேகரித்துக் கொண்டுள்ளேன்.

மக்களின் நலன் கருதி

அன்புடன்

முனைவர் சுதாகர் பிச்சைமுத்து

சுவான்சி பல்கலைக் கழகம்

19/02/2018

at AMRSan Workshop held at ICT Mumbai, Feb 3-8, 2018