மொழி என்னும் பெருவரம்-2 மொழி பரிமாற்றக் கருவிகள் (Language translators)

இன்று சந்தையில் கிடைக்கும் எலக்ரானிக் கருவிகளை ஒப்பிடுகையில், இந்தியாவில் அதிகம் விற்க வேண்டியது மொழி பரிமாற்று கருவிகள்தான் (Language translators).

ஏனெனில் இந்தியாவில் அரசு அலுவல் மொழியாகவே 22 மொழிகள் உள்ளது. ஏறத்தாழ 130 கோடி மக்கள் உள்ள இந்திய தேசத்தில் மொழி சார்ந்து மிகப்பெரிய வணிக சந்தையே உள்ளது.ஆனால் இந்த மொழிகளை ஒவ்வொரு மாநிலத்தவரும் எளிதாக அறிவதற்கான ஒரு கருவி ஏன் இது வரை செய்யப்படவே இல்லை என்பது மிகப்பெரிய ஆச்சரியத்தை தருகிறது.

இந்த மொழிபரிமாற்று வசதி இந்திய பாராளுமன்றத்தில் (simultaneous interpretation system) உள்ளது. மொழிவாரி மாநில உறுப்பினர்களுக்கு ஏதுவாக பிற மாநில உறுப்பினர்கள் பேசுவதை அவர்கள் விரும்பும் மொழிக்கு  மாற்றி தருவார்கள். பல் மொழி (multiple languages) பேசும் ஐ.நா சபை, ஐரோப்பிய மன்றம் இவற்றில் இது போன்ற வசதி உண்டு. இந்தியாவில் பாரளுமன்ற உறுப்பினர்கள் அவர்கள் காதில் போட்டுக் கொண்டிருக்கும் ஹெட் போனில் உறுப்பினர்கள் பேசுவதை துல்லியமாக கேட்பதோடு அவர்கள் விரும்பும் அலுவல் மொழியில் (selected list) ஒன்றை தேர்ந்தெடுக்கும் வசதியும் உள்ளது.

இவ்வாறான மொழி பரிமாற்று கருவிகளில் உள்ள நுட்பம் இருபது ஆண்டுகளுக்கு முன்பு சந்தையில் அதிக விலைக்கு மட்டுமே கிடைத்தது. ஆனால், இன்று எலக்ரானியல் துறையில் ஏற்பட்ட நவீன வளர்ச்சி மொழி பரிமாற்று துறையில் வியத்தகு வசதிகளை ஏற்படுத்தி உள்ளதோடு மிகக் குறைந்த விலைக்கும் இத்தையக கருவிகள் கிடைக்கிறது. இன்றைக்கு மக்கள் வெகுவாக பயன்படுத்தும் கையடக்க கூகுள், ஆன்ட்ராய்ட் மொபைல் பேசிகளில் கூட மொழி பரிமாற்று வசதி எளிதாக வந்துவிட்டது.

சீனா, கொரியா, ஜப்பான் நாடுகளில் கையடக்க அளவில் நாம் பயன்படுத்தும் கால்குலேட்டர் போல‌ மொழி பரிமாற்று கருவிகள் கிடைக்கிறது.  இவர்களது மொழியினை உடனுக்குடன் ஆங்கிலத்தில் மொழி பரிமாற்றம் செய்து கொடுப்பதால் வர்த்தக தளத்தில்   பிற மொழி பேசுபவர்களுடனான‌ உரையாடலை எளிதாக்கி உள்ளது.  மேலும் இந்நாடுகளில் உள்ள பள்ளி, பல்கலைக் கழக மாணவர்கள் சொல் அகராதியாகவும், ஆராய்ச்சி கட்டுரைகளை மொழி பெயர்க்க, ஆங்கிலத்தில் உள்ள உயர்கல்வி புத்தகங்களை புரிந்து கொள்ள அதிகமாக பயன்படுத்துகின்றனர்.

சந்தையில் கிடைக்கும் மொழி பரிமாற்று கருவிகள்.

ஆனால் இந்தியா போன்ற பல் மொழி பேசும் நாட்டில் இந்த கருவிகளை உள்நாட்டிலேயே உற்பத்தி செய்யலாம். இந்த வசதி இந்தியாவில் வணிக நிமித்தம் ஒரு மாநிலத்தில் இருந்து மற்ற மாநிலத்திற்கு பயணம் செய்பவர்கள், ஓட்டுநர்கள், சுற்றுலா பயணிகள், விடுதி சிப்பந்திகள் என பல தரப்பட்ட மக்களுக்கு மிக்கபெரிய அளவில் கை கொடுக்கும்.

தமிழ் மொழியில் உள்ள ஒரு வார்த்தையினை குரலாக பேசி உள்ளீடாக தரும் போது அதனை ஆங்கிலம், மலையாளம், கன்னடம், தெலுகு, இந்தி, வங்காளம், குஜராத்தி என எல்லா மொழிகளையும் பரிமாற்றும் வசதியை எளிதாக கொண்டு வர முடியும்.

இன்றைக்கு மீநுண் நுட்பத்தில் (nanotechnology) தகவல் சேமிப்பில் ஏற்பட்டுள்ள புரட்சி இத்தையக பன்மொழி பரிமாற்றத்தினை மேலும் எளிதாக்க தர இயலும். அதாவது இன்று நீங்கள் பயன்படுத்தும் 8 ஜிகா பைட் (8 GB) உள்ள டிரைவில் ஒரு சொல் அகராதியை நிறுவி விட்டால், நீங்கள் தேடும் வார்த்தையினை தட்டச்சும் போது அதற்கு இணையான பிற மொழி வார்த்தையினை உடனே பெறலாம். இவ்வாறு நீங்கள் செய்யும் போது ஒரு வருடத்தில் குறைந்தது 100 வார்த்தைகளையாவது நீங்கள் திருப்பி திருப்பி மொழி பரிமாற்றம் செய்யும் போது அதற்கு இணையான வார்த்தைகளை உங்கள் மூளை பதிவு செய்து கொள்ளும்.மெனக் கெட்டு இந்தியினை திணித்து, உள்ளூர்காரர்களின் தாய்மொழியையும் சிதைத்துத்தான் ஒரு மொழியை வளர்க்க வேண்டியதில்லை.

ஐரோப்பிய ஒன்றியப்  பகுதிகளில் நான் அடிக்கடி பயணம் செய்யும் போது நான் ஆச்சரியப் படுவது உள்ளங்கை அளவே உள்ள மிகச்சிறிய சொல் அகராதிகள் (mini dictionary) புத்தக சந்தைகளில் குறைந்த விலைக்கு கிடைக்கிறது. இவற்றோடு ஆங்கிலத்தில் இருந்து எல்லா மொழிகளுக்குமான சொல் அகராதிகளும் சந்தையில் கிடைக்கிறது. ஒரு முறை பயணத்தில் சோதனை முயற்சியாக இந்த கையடக்க சொல் அகராதியை பயன்படுத்துங்களேன். அடுத்த முறை நீங்கள் பத்து புதிய வார்த்தைகளையாவது மற்றொரு மொழியில் தெரிந்து வைத்திருப்பீர்கள்.

ஆயிரக்கணக்கான பிற மொழி வார்த்தைகளை எலக்ரானியல் கருவிகளில் தரும் போது அதற்கான நினைவக (memory) வசதி உள்ளதா?

2000 ஆம் ஆண்டில் எலக்ரானிக் சந்தையில் USB (universal series bus) டிரைவ் அறிமுகப்படுத்தப்பட்ட போது அதன் டேட்டா கொள்ளளவு 8 MB (1 MB= 1048576 Byte). அன்றைய கால கட்டத்தில் வழமையாக பயன்படுத்தப்பட்டு வந்த 3.5 இஞ்ச் அளவுள்ள பிளாப்பி டிஸ்க்கின் நினைவக‌ கொள்ளளவை விட 11,380 மடங்கு USB டிரைவின்  கொள்ளளவு  அதிகம்.

பிறகு USB டிரைவில் உள்ள நினைவகங்களில் டேட்டாவை பதிந்து வைக்கும் வேகம் (மெகாபைட்/செகன்டு), அதில் பயன்படுத்தப்படும் குறைகடத்தி (semiconductor) பொருள் என பல்வேறு வளர்ச்சியினால் தற்போது வடிவத்தில், எடையில் அதே அளவுள்ள 8 MB USB டிரைவின் இடத்தில் 8ஜிபி, 256 ஜிபி, 512 ஜிபி வரை தற்போது கிடைக்கிறது.  தற்போது தற்போது நினைவகத்தின் கொள்ளளவு “டெரா பைட்” அளவில் இன்னும் விரிவடைந்து ஒரு நூலகத்தில் உள்ள அத்தனை புத்தகங்களையும் சுருக்கி சட்டைப்பைக்குள் வைக்கும் அளவிற்கு சென்று கொண்டுள்ளது.

சரி இப்போது விசயத்திற்கு வருகிறேன்.

மேலே சொன்னபடி, கடந்த காலத்தை ஒப்பிடும் போது மொழி பரிமாற்று கருவிகள் தமிழில் இருந்து பல மொழிகளையும் உடனுக்குடன் மொழி பெயர்க்கும் வண்ணம் செய்ய நினைவக கருவிகளின் நுட்ப வளர்ச்சி நிச்சயம் கை கொடுக்கும். குறைந்த பட்சம் ஆங்கிலம், இந்தி, தென்னிந்திய மொழிகள் உள்ளிட்ட ஆறு மொழிகளுக்கான சொல் அகராதியை உடனுக்குடன் வார்த்தைகளாக மொழி பெயர்க்கும் கருவிகளை மிகக் குறைந்த விலையில் சந்தைக்கு கொண்டு வரலாம். பின்னர் குரல் உள்ளீட்டு மொழி பரிமாற்று கருவிகளை (audio translator) வெகு எளிதாக கொண்டு வரலாம்.

சமீபத்தில் உடனுக்குடன் குரல் பரிமாற்றம் செய்யும் (instantaneous interpretation) கருவியினை சீனா உலக‌ சந்தையில் அறிமுகப்படுத்தி உள்ளது. சீன மொழியில் எவ்வளவு பெரிய வாக்கியத்தினை பேசினாலும் உடனடியாக ஆங்கிலத்திலும், அதே போல ஆங்கிலத்தில் இருந்து சீன மொழிக்கும் பரிமாற்றம் செய்து தருகிறது இக்கருவி. ஜப்பானியர்கள் ஒரு படி மேலே போய் உடையில் அணிந்து கொள்ளும் (ili wearable translator) மொழி பரிமாற்று கருவிகளை சந்தைக்கு கொண்டு வந்துள்ளனர். இத்தையக வசதி அந்நாட்டிற்கு வணிக ரீதியில் வருபவர்களுடன் உரையாடுவதற்கு எளிதில் கை கொடுக்கிறது.

World first wearable language translator (ili- Japan product)

Pilot: Language Translator (smart earpiece language translator)

இந்த குரல் பரிமாற்று கருவிகளில் மற்றொரு வசதியும் உள்ளது. ஒரு மொழியில் இருந்து மற்றொரு மொழிக்கு புத்தகங்களை மொழி பெயர்க்கும் போது அதனை அப்புத்தகம் எழுதப்பட்ட மொழியில் ஒருவர் பேசி குரல் உள்ளீடாக தந்து விட்டால் போதும். நாம் விரும்பும் மொழிக்கு எளிதாக பரிமாற்றம் செய்து கொள்ளலாம். இதன் மூலம் ஒரு மொழியில் கிடைக்கும் தகவல்கள் மற்றொரு மொழியினருக்கும் எளிதாக கொண்டு செல்லலாம். தற்போது சந்தையில் கிடைக்கும் ஆடியோ புத்தகங்களை இதற்கு நல்ல உதாரணமாக சொல்லலாம்.

விமானப் பயணங்களில் சிப்பந்திகள் பாதுகாப்பு அறிவிப்புகளை ஒரு மொழியில் தரும் போது அதனை தேவைப்படும் உள்ளூர் மொழிக்கும் மாற்றிக் கொள்வதற்கான‌ வசதிகளை எளிதாக இந்த நுட்பத்தின் மூலம் கொண்டு வர முடியும்.

தமிழ் மொழியினை நுகர்வு சந்தைகளில் பயன்படுத்தும் போது நம்மவர்களுக்கு பெரிய அளவில் வேலை வாய்ப்பினை ஏற்படுத்தும். மொழி பரிமாற்ற விசயத்தில் நாம் நகர வேண்டிய தளம் இதுவே. நவீன நுட்பங்கள் உதவியுடன் தமிழகத்தின் சுற்றுலா தலங்களில் ஆடியோ கைடு எனப்படும் குரல் உள்ளீட்டு மொழி பரிமாற்ற கருவிகளை அறிமுகப்படுத்தலாம். தமிழகத்திற்கு வரும் பல நாட்டவருக்கும் நம் கலாச்சார தகவல்களை எளிதில் பதிய வைக்க முடியும்.

சந்தையில் கிடைக்கும் குரல் வழி சுற்றுலா வழிகாட்டி கருவிகள் (audio tour guide devices)

At Alhambra palace, Spain. Wearing audio tour guide device.

அத்தோடு எலக்ரானியல் கருவிகளில் தமிழை ஒரு இயக்கு மொழியாக (operating language) மாற்ற இந்த வசதி பெரிதும் உதவும்.

இப்படி நாம் சொல்லிக் கொண்டே போகலாம். ஆகவே இதில் முதல்படியாக தமிழில் இருந்து ஆங்கிலம் மற்றும் பிற மொழிகளுக்கான எலக்ரானியல் சொல் அகராதியை தயார் செய்வோம்.

முனைவர் சுதாகர் பிச்சைமுத்து

E-mail: vedichi@gmail.com

சுவான்சி பல்கலைக் கழகம்

09-07-2017

நான் வழக்காம சாப்பிடற உணவகத்தில் இன்றைக்கு சாப்பிட்டுக் கொண்டிருந்த போது காவல்துறை பெண்மணி இரண்டு பேர் நகர சோதனைக்கு குதிரையில் வந்து கொண்டு இருந்தார்கள். இதமான வெயில் வெளியே அடித்துக் கொண்டிருந்தது.

அவர்களுக்கு எதாவது சாப்பிடலாம் என்று இருந்திருக்கும் போல் தெரிகிறது. ஒரு வழியா பார்க்கிங் தேடி நான் சாப்பிட்டுக் கொண்டிருந்த உணவகத்தின் வாசலில் கொண்டு வந்து குதிரையை நிறுத்தி கொண்டு இருந்தார்கள்.நான் சாப்பிட்டுக் கொண்டிருந்த உணவகத்தின் சிப்பந்தி வெளியே சென்று உங்களுக்கு உணவருந்த ஏதேனும் வேண்டுமா? என கனிவோடு விசாரித்துக் கொண்டிருந்தார். அவர்கள் நன்றி என்று சொல்லி விட்டு ஒரு காவலர் மட்டும் அருகில் இருந்த ஐஸ் கிரீம் கடைக்கு சென்றார்.

நான் சாப்பிட்டு முடித்து விட்டு வெளியே வந்து அந்த காவலர்களுக்கு ஒரு ஹாய் சொல்லி விட்டு, எப்படி இவ்வளவு உயரமான குதிரைகளை சமாளிக்கிறீர்கள் என கேட்டேன். இந்தியாவில் பெரும்பாலும் குதிரைகள் இவ்வளவு உயரம் கிடையாது என சொன்னேன். ஓ அப்படியா என ஆச்சரியமாக கேட்டார்கள். நான் பேசிக் கொண்டிருந்த போது ஒரு சீன யுவதி குதிரையின் முகத்தில் வாஞ்சையாக தடவிக் கொடுத்தாள்.

உண்மையில் இவ்வளவு உயரமான குதிரைகளை கடுமையான உடற் பயிற்சியோடு கூடிய உடற் கட்டு இருந்தால்தான் சமாளிக்க முடியும். இதன் மீது ஏறுவதற்கே தனியாக ஏணி தேவைப்படும் போல. இயல்பாகவே ஐரோப்பிய பெண்மணிகள் தங்கள் உடல் நலத்தை பேணுவதில் அதிகம் அக்கறை செலுத்துகின்றனர்.

குறிப்பாக‌ தினமும் மெது ஓட்டம், மாரத்தான், நீச்சல், கடலில் பாய் மரம் ஓட்டுதல், குழு விளையாட்டு என எல்லா வயதிலும் தங்கள் உடற்பயிற்சியினை நிறுத்துவதே இல்லை.

இந்த இரும்பு பெண்களோடு ஒப்பிடுகையில் என் பள்ளி காலத்தில் நான் பார்த்த பெண்கள் இருந்தார்கள். கட்டு நிறைய கரும்பு தோகையை, பச்சை கோரை, 20 அடி நீளமுள்ள விட்டக் குச்சி கட்டை இவற்றை எல்லாம் அலாக்காக தூக்கிக் கொண்டு போவதை எங்கள் கிராமத்தில் இயல்பாக‌ கடந்து இருக்கேன். அந்த அளவுக்கு அவர்களது உழைப்பும், சாப்பாடும் இருந்துச்சு. ஆனாலும் அவர்களுடைய உடல் நலன் மீது அவர்களுக்கு எந்த அக்கறையும் இருக்காது, அல்லது கவனிக்க கூட அனுமதிக்காத‌ சூழலில்தான் இருந்தார்கள். தங்கள் உடல் நலத்தை விட தங்கள் குடும்பத்திற்காகவே ஓடி ஓடி தேய்ந்தார்கள்.

காலம் நிறைய மாறி இருக்கிறது. உடல் உழைப்பு வழியாக‌ பெண்கள் மீதான‌ அடக்குமுறைக்கு நவீன நுட்பங்கள் விடுதலை தந்துள்ளது. அதே வேளை அவர்கள் உடல் நலத்தில் போதிய அக்கறை செலுத்துகிறார்களா எனத் தெரியவில்லை.

சிறிது நேரம் அந்த காவலர்களுடன் பேசி விட்டு நான் கிளம்பி விட்டேன்.

இங்கே உள்ள காவலர்களோடு மட்டும் எப்படி இவ்வளவு இயல்பாக உரையாட முடிகிறது. வேற்றுக் கிரக வாசிகள் போல் அவர்களை பார்த்து ஒதுங்காமல் எல்லோரும் புன்னகையோடு எதிர் கொள்கிறார்கள். காரணம் இங்கே ஆரம்ப பள்ளியில் காவலர்கள் நேரடியாக பள்ளிக்கு வந்து குழந்தைகளுடன் உரையாடுகிறார்கள். காவலரின் பணி என்ன, அவர்களை எப்படி தொடர்பு கொள்ள வேண்டும் என விளக்குகிறார்கள். இதுதான் ஒரு இயல்பான இறுக்கமற்ற சூழலை இங்கே வைத்துள்ளது.

காவலர்கள் நம்மிடம் எதிர்பார்ப்பது நட்பு கலந்த புன்னகையும், அக்கறையான விசாரிப்புகளுமே. நம் பள்ளி பாடத்திட்டத்தில் இந்த முறையினை கொண்டு வரலாம்.

கடும் கோடையில், மழையில் நம் ஊரில் இது போல் சாலை பாதுகாப்பிலும், உள்ளூர் பந்தோபஸ்து பணியிலும் இருப்பவர்களிடம் ஹலோ என்று ஒரு புன்னைகை செய்யுங்கள். எல்லா காக்கி சட்டைக்குள்ளும் இருப்பவர் மனிதர்கள்தானே!

 ஜப்பானின் மிக நீண்ட சூரிய மின் உற்பத்தி நிலையம்

உலகின் முக்கியமான சர்வதேச பறப்பகங்களில் ஒன்று ஜப்பானில் உள்ள‌ நரிதா (Narita) சர்வதேச பறப்பகம். இப்பறப்பம் ஜப்பானின் சிபா (Chiba) மாவட்டத்தில் எல்லையில் உள்ளது. தோக்கியோ நகரில் இருந்து ஏறத்தாழ 40 கிமீ தொலைவில் உள்ளது. இப்பறப்பகத்திற்கு தோக்கியோ நகரில் இருந்து செல்லும்  ஸ்கை ஆக்சஸ், கொக்குசோ (Hokuso Railways) ரயில் தடத்தில் பத்து கி.மீ நீளத்திற்கு சூரிய மின் நிலையத்தினை அமைத்துள்ளனர். இரயில் தடத்தின் பக்கவாட்டில் மீதமுள்ள காலியிடத்தில் இந்த மின்நிலையத்தினை அமைத்துள்ளனர்.

நரிதா ஸ்கை ஆக்சஸ் ரயில் வழித் தடத்தினை காட்டும் படம். இதில் முதல் படத்தில் மஞ்சள் கோடிட்டு காட்டிய 10 கிமீ தொலைவிற்கு சோலார் பேனல்கள் நிறுவப்பட்டுள்ளது. இரண்டாவது படம் (கீழே) இம்பா நிகோன் இதாய் ரயில் நிலையத்தில் அமைக்கப்பட்டுள்ள சோலார் பேனலகள். (நன்றி கூகுள் சேட்டிலைட் படம்)

சிபா மாவட்டத்தில் உள்ள முசாய், சிரோய், வகாகி, இன்சாய் நகரங்களை உள்ளடக்கிய இப்பகுதியில் நிறுவப்பட்டுள்ள ஜப்பானின் மிக நீளமான இந்த சூரிய ஆற்றல் உற்பத்தி நிலையத்தினை சிபா மாவட்ட அரசே நிர்வ‌கிக்கிறது. இத்திட்டத்தின் மூலம் 12.8 மெகாவாட் (12,81,000,00 வாட்) மின்சாரம் பெறப்படுகிறது.

"SGET Chiba New Town Mega Solar Power Plant" bird eye view (source: SGET)

தோக்கியோ நகரில் இருந்து நரிதா சர்வதேச பறப்பகத்திற்கு செல்பவர்கள் சிபா நியூ டவுன் சுவோ ரயில் நிலையம் தொடங்கி, இம்பாநிகோன் இதாய், இன்சாய் மசினோகரா இரயில் நிலையம் வரை தொடர்ச்சியாக நிறுவப்பட்டுள்ள சூரிய மின் நிலையத்தினை காணலாம்.  உலகின் கவனத்தை ஈர்த்த இத்திட்டத்தினை  Sget Kamisu Mega Solar Limited Liability Corporation  என்ற நிறுவனத்தினர் வடிவமைத்து செயல்படுத்தியுள்ளனர். இத்திட்டத்தில் உலகின் முன்னோடி ஜப்பானிய நிறுவனங்களான புஜி, தோசிபா போன்ற நிறுவனங்கள் சோலார் பேனல்கள், இன்வெர்ட்டர் போன்ற எலக்ரானியல் பொருட்களை இத்திட்டத்திற்கு (SGET Chiba New Town Mega Solar Power Plant) தந்துள்ளனர். 

எப்படி ரயில் பாதையில் அருகில் இத்திட்டத்தினை அமைக்கும் எண்ணம் இவர்களுக்கு உதித்தது?

தோக்கியோ நகரில் இருந்து நரிதா சர்வதேச பறப்பகத்திற்கு செல்லும் இரயில் தடத்தில் ஸ்கை ஆக்சஸ் (Sky Access) புல்லட் இரயில் திட்டத்திற்கு இப்பகுதியில் உள்ள மக்கள் கடும் எதிர்ப்பு தெரிவிக்க இத்திட்டம் கைவிடப்பட்டது. அந்த இடத்தினை வீணாக்காமல் ஜப்பானியர்கள் தற்போது சூரிய மின் உற்பத்தி நிலையத்தினை தொடக்கி வைத்து விட்டனர். இத்திட்டம் குறித்து ஆலோசனைகள் 2010 ஆம் ஆண்டு பெறப்பட்டு தற்போது இத்திட்டம் நிறைவடைந்து மின் உற்பத்தி பயன்பாட்டிற்கு வந்துள்ளது.

ஏற்கனவே பத்து ஆண்டுகளுக்கு முன்பாகவே ஜப்பானில் உள்ள இரயில் நிலையங்களில் உள்ள ஸ்மார்ட் கார்டுகள் மூலம் இயங்கும் டிக்கட் கதவுகள், இரயில்வே நடைமேடைகளில் நிறுவப்பட்டுள்ள பாதுகாப்பு கதவுகள் ஆகியவற்றை முழுவதும் சூரிய ஆற்றலைக் கொண்டே இயங்கும் நுட்பம் வந்து விட்டது. தற்போது அந்த வரிசையில் இரயில் பாதையின் ஓரத்தில் ஜப்பானின் மிக நீண்ட சூரிய மின் உற்பத்தி நிலையத்தை அமைத்து உலகின் கவனத்தை ஈர்த்துள்ளது.

மக்கள் தொகை அடிப்படையிலான மின் உற்பத்தி திறனில் (Energy Consumption per Capita) மிகச்சிறிய நாடான ஜப்பானை (~7000 கிலோவாட்/மணி) விட ஏறத்தாழ 7 மடங்கு நாம் பின்னால் உள்ளோம் (~1100 கிலோவாட்/மணி). இத்தனைக்கும் ஜப்பானில் நான்கு மாதம் கடும் குளிர் காலம். குறைவான சூரிய ஒளியே கிடைக்கும். இச்சூழலிலும் அவர்கள் இது போன்ற திட்டங்களில் தொடர்ந்து ஜப்பானியர்கள்  ஆர்வம் செலுத்தி வருவதற்கு காரணம் அங்கு இயங்கும் மிக அதிகமான தொழிற்சாலைகள்.

இந்தியாவில் ஆண்டு முழுவதும் செறிவான சூரிய ஒளி கிடைக்கிறது. நிச்சயம் சூரிய மின் திட்டத்தினை வெகுவாக ஊக்குவிப்பதன் முலம் தனிநபருக்கான மின் உற்பத்தி திறனை இன்னும் பல மடங்கு நம்மால் உயர்த்த முடியும். மேலும் சூரிய மின் திட்டமானது சுற்றுப் புற சூழலுக்கு உடனடி மாசை ஏற்படுத்தாது. ஆகையால் இந்தியா முழுவதும் பயன்பாட்டில் இல்லாத காலி நிலங்களில் சூரிய மின் உற்பத்தி திட்டத்தினை செயல்படுத்தலாம்.

நரிதா ஸ்கை ஆக்சஸ் ரயில் தடத்தில் நான் பயணித்த போது எடுத்த காணொளியினை இங்கு இணைத்துள்ளேன்.

**பள்ளி மாணவர்களுக்கு இத்தகவலை பகிருங்கள்.

வெகுசன அறிவியல் விளையாட்டு சோதனைகள் (Solar Cells)

சூரிய மின் கலம் (solar cells) என்பது சூரிய ஒளியினை குறைகடைத்தி (semiconductor) மூலம் மின்சார ஆற்றலாக மாற்றும் ஒரு கருவி ஆகும். இதனை குழந்தைகளுக்கு எப்படி எளிய சோதனை மூலம் விளையாட்டின் மூலம் புரிய வைப்பது? 

பிரித்தானியாவில் உள்ள பிரிஸ்டல் (Bristol) நகரில் அறிவியல் கண்காட்சி மையம் அமைந்துள்ள பகுதியில் தெருவில் ஒரு எளிய சோதனை அமைப்பினை வைத்துள்ளார்கள். அதன் மீது சூரிய மின் கலம் எப்படி செயலாற்றுகிறது என கார்ட்டூன் படம் மூலம் விளக்கி உள்ளார்கள். பெரிய பலகையில் நிறைய சூரிய மின் கலங்களை வரிசையாக இணைத்து பேனலாக வைத்திருந்தார்கள். இதனோடு இணைக்கப்பட்ட ஒலி பெருக்கி ஒன்றில் பாட்டு ஒன்று பாடிக் கொண்டுள்ளது. 

பாட்டின் சத்தத்தின் அளவானது சூரிய மின்கலத்தில் தயார் ஆகும் மின்னோட்டத்தின் (current) அளவைப் பொறுத்து அமையும். உதாரணத்திற்கு சுற்றில் (circuit) மின்னோட்டம் குறையும் போது பாடும் ஒலியின் அளவும் (sound) குறையும். இதே தத்துவத்தை அடிப்படையாக கொண்டுதான் ரேடியோ, அல்லது இதர ஒலிபெருக்கி கருவிகளில் ஒலி அளவினை கட்டுப்படுத்த பயன்படுத்துகிறோம். சுருக்கமாக ஒரு மின்சுற்றில் தடையினை (resistance) எந்த அளவுக்கு ஏற்படுத்துகிறோமோ அதற்கு இணையாக அதனுடன் இணைக்கப்பட்டுள்ள ஒலி பெருக்கியில் ஒலியின் அளவு குறையும். 

இதே தத்துவத்தை அவர்கள் சோலார் பேனல்களில் ஒரு தடையினை ஏற்படுத்துவதன் மூலம் எளிதாக உணரலாம். உதாரணத்திற்கு சூரிய மின் கலம் மீது ஒளி விழுவதை குழந்தைகள் தங்கள் கைகளால் மறைத்தோ அல்லது இரண்டு மூன்று பேர் சூழ்ந்து நின்று அதன் மீது நிழலை ஏற்படுத்தும் போதே பேனலில் உருவாகும் மொத்த மின்னோட்டத்தின் அளவு குறையும் போது ஒலியின் அளவு குறையும்.

இவ்வாறு எளிய விளையாட்டு சோதனைகளை நாம் அன்றாடம் குழந்தைகள் புழங்கும் இடத்தில் தெருக்களில் அமைக்க வேண்டும். அதனை சீராக பராமரிக்கும் தனி மனித ஒழுக்கத்தையும் நாம் கற்றுக் கொள்ளவும், கற்றுக் கொடுக்கவுமான சமூகத்தை முன்னெடுக்க வேண்டும்.

இனி வரும் காலம் அறிவியல் நுட்பத்தின் காலம், அவற்றில் நம் குழந்தைகள் சிறந்து விளங்குவதற்கான எளிய முன்னெடுப்புகளை செய்வோம்.

 

Solar cells experiment- Bristol Science Museum, UK

Solar cells experiment- Bristol Science Museum, UK

Solar cells experiment- Bristol Science Museum, UK

தாய்மொழியில் அறிவியல் புத்தகங்கள், ஆய்விதழ்கள் - வழிகாட்டும் ஜப்பான்

நோபல் பரிசு வரலாற்றில் ஜப்பான் இது வரை 25 விருதுகளை வென்றுள்ளது. இந்த விருது பட்டியலில் தலா ஒரு விருது இலக்கியம் மற்றும் அமைதிக்காக வழங்கபட்டது, ஏனைய 23 விருதுகள் இயற்பியல், வேதியியல், மற்றும் மருத்துவ துறைக்கு வழங்கப்பட்டுள்ளது.

ஜப்பானில் 86 தேசிய பல்கலைக் கழகங்கள் உள்ளது. இது தவிர 96 பொது பல்கலைக் கழகங்களும், 597 தனியார் பல்கலைக் கழகங்களும் உள்ளது. இதில் ஏறத்தாழ 26 பல்கலைக் கழங்களில் மட்டும் இளம் நிலையில் இருந்து உயர்கல்வி வரை ஆங்கிலம் பயிற்று மொழியாக உள்ளது. ஏனைய கல்வி நிறுவனங்கள் அனைத்தும் முழுக்க ஜப்பானியர்களின் தாய்மொழியாகிய ஜப்பானிய மொழியிலேயே நடத்தப்படுகிறது.

ஆரம்ப பள்ளி முதல், உயர்கல்வி ஆராய்ச்சி வரை ஜப்பானில் அவர்களது தாய்மொழி மூலம் பயில‌ 90 சதவிகித கல்வி நிறுவனங்கள் வாய்ப்பளிக்கிறது. இதன் வாயிலாக ஜப்பானியர்கள் அறிவியல் மற்றும் நுட்ப துறைகளில் உலக அளவில் கோலோச்சுகின்றனர்.

ஆங்கிலத்தை உலகிற்கான இணைப்பு மொழியாக தொழில் நிறுவனங்களில் வைத்துக் கொண்டு முழுக்க பள்ளி மற்றும் உயர்கல்வியினை அவர்களது தாய்மொழியிலேயே தருகிறார்கள்.

முக்கியமாக‌, ஜப்பானில் படிக்கும் பள்ளி மாணவர்களுக்கு பாடத்திட்டத்திற்கு வெளியே பரந்துபட்ட அளவில் வெகுசன அறிவியல் புத்தகங்கள் கிடைக்கிறது. இந்த வசதி இம்மாணவர்களை கண்டுபிடிப்பாளர்களாக உருவாக்குகிறது.

ஜப்பானில் உயர்கல்வி ஆராய்ச்சியாளர்கள் பெரும்பாலும் தங்களது தாய்மொழியிலேயே ஆராய்ச்சி கட்டுரைகளை வெளியிடுவதால் உள்ளூர் நிறுவனங்கள் எளிதாக அவற்றினை பயன்படுத்திக் கொள்கிறார்கள். இதனால் உள்ளூரில் புதிய நுட்ப தொழில்களில் முதலீடு செய்வோரின் எண்ணிக்கை அதிக அளவில் உள்ளது. இந்த வாய்ப்பு இவர்களது வேலை வாய்ப்பு விகிதத்தை உயர்த்தியுள்ளது. தற்போது ஜப்பானில் சராசரியாக 100 நபர்களுக்கு 130 வேலை வாய்ப்பு பணிகள் கிடைக்கும் வாய்ப்பு உள்ளது.

தமிழகத்தில் 7 கோடிக்கும் மேற்பட்ட மக்கள் தொகை உள்ளது, ஆனால் தாய்மொழியில் காணக் கிடைக்கும் வெகுசன அறிவியல் அடிப்படை புத்தகங்கள், ஆராய்ச்சி இதழ்கள் இவை தமிழில் அரிதினும் அரிதாகவே கிடைக்கிறது. இனியாவது காலம் தாழ்த்தாமல் தமிழ் மொழியில் பல மொழி பெயர்ப்பு புத்தகங்களை கொண்டு வரலாம். உயர்கல்வி ஆராய்ச்சியில் ஈடுபட்டுள்ளவர்கள் தமிழ் மொழியில் எளிய மக்களுக்கு புரியும் வகையில் சமகால நுட்பங்களை எழுதலாம். அறிவியலுக்கு வெளியே இருப்பவர்கள் வெகுசன அறிவியல் புத்தகங்கள் எழுதலாம்.

எங்களது தோக்கியோ அறிவியல் பல்கலைக் கழக வளாகத்தில் உள்ள சர்வதேச போட்டோ கேட்டலிஸ்ட் மையத்தில் காணக் கிடைக்கும் ஜப்பானிய ஆய்விதழ்கள், வெகுசன இதழ்கள் பற்றிய தகவல்களை இக்காணொளியில் பதிவு செய்துள்ளேன்.

இதனை உங்கள் நண்பர்களுக்கு முகநூல், வாட்சப் மூலம் பகிர்ந்து உதவுங்கள்.

உங்கள் கருத்துகளையும், மொழி பரிமாற்றத்திற்கு பரிந்துரைக்கும் அறிவியல் மற்றும் நுட்ப புத்தகங்களை கீழ்கண்ட மின்னஞ்சலுக்கு அனுப்பவும். 

tamilsciencebooks@gmail.com

நன்றி!

சுதாகர் பிச்சைமுத்து

Note:

Video Courtesy: Dr Nithish Roy

My Sincere thanks to Photocatalysis International Research Center, Tokyo University of Science, Japan.

**This video can be used only for education purpose.

Youtube link

பிளாஸ்டிக் அரிசி வீண் வதந்தி - 2 (அரிசி ஏன் ஓட்டுகிறது)

பிளாஸ்டிக் அரிசியின் பீதிக்கு மிக முக்கிய காரணம் வேக வைத்த சாதத்தை ஆற வைத்து நன்கு பிசைந்து உருட்டும் போது அவை பந்து போல இறுகவதுதான்.

இந்த குழப்பம் எல்லாம் ஏன் வருகிறது?

காலம் காலமாய் சோற்றை சாப்பிடுபவர்கள் இது போன்ற விளையாட்டு சோதனைகளை செய்து பார்க்க தோன்றுவதில்லை. இதன் விளைவாகத்தான் பிளாஸ்டிக் அரிசி போன்ற வீண் பயம் நமக்கு ஏற்படுகிறது. பயம் ஏற்படுவது இயற்கைதான், ஆனால் அது சரியா, தவறா என அறிவியலில் துணை கொண்டு நிச்சயம் தெளிவுற வேண்டும்.

முதலில் சோற்றுப் பருக்கையினை கையால் நசுக்கும் போது ஏன் அது ஒட்டுகிறது என்ற அடிப்படை அறிவியலை காண்போம்.

அரிசியினை கையால் அள்ளலாம். அது கையில் ஒட்டாது. அப்படியே குளிர்ந்த நீரில் போட்டு சிறிது நேரம் போட்டு ஊர வைத்து விட்டு மீண்டும் கையில் அள்ளுங்கள். இப்போதும் அரிசி கையில் ஒட்டாது.

ஆனால் கொதிக்கும் நீரில் அரை மணி நேரம் அரிசியினை போட்டு பிறகு கையில் எடுத்தால் பிசு பிசுவென ஒட்டுகிறது. அப்படியானால் சுடுநீரில் போட்ட பிறகு அரிசிக்கு எப்படி ஒட்டும் தன்மை கிடைக்கிறது. இது பற்றி இன்னும் கொஞ்சம் விளக்கமாக பார்ப்போம்.

அரிசியில் இரண்டு விதமான ஸ்டார்ச் மூலக்கூறுகள் உள்ளது. ஒன்று அமிலோஸ் மற்றொன்று அமிலோ பெக்டின். சுடு நீரில் அரிசியைப் போடும் போது அமிலோ பெக்டின் ஸ்டார்ச் மூலகூறுகள் சங்கிலி போன்ற நீண்ட‌ பிணைப்பில் இருந்து உடைந்து வெளியேறுகிறது. இந்த ஸ்டார்ச் மூலக்கூறூகள் வெளியேற்றத்தால் அவை மிருதுவாகி, பசை போல் ஒட்டும் தன்மையினை பெறுகின்றன.

இந்திய அரிசியினை ஒப்பிடும் போது தென் கிழக்கு ஆசிய நாடுகளில் (கொரியா, சீனா, தைவான், ஜப்பான்) உள்ள அரிசியில் அதிக அளவு அமிலோபெக்டின் ஸ்டார்ச்சும், மிகக்குறைந்த அளவே அமிலோஸ் ஸ்டார்ச்சும் உள்ளது. ஆகவே தான் இந்த நாடுகளில் உள்ள அரிசி சமைத்த பின் அதிக ஒட்டும் தன்மை பெறுகிறது.

இப்படித்தான் நம் ஊர் அரிசியிலும் ஸ்டார்ச் வெளியேறும் போது அவை ஒட்டும் தன்மை பெறுகிறது. இதனை நன்கு கையால் பிசைந்து அழுத்தம் தரும் போது அவை பந்து போல் இறுகிக் கொள்கிறது.

மற்றொன்று தரையின் மீது இந்த சோற்று உருண்டையினை போடும் போது தரையானது சமமான‌ எதிர் விசையினை சோற்று உருண்டை மீது செலுத்தும் போது அவை பந்து போல் குதிக்கும். இதே இந்த சோற்று உருண்டையினை ஒரு துணி மீது போட்டால் அதே அளவிற்கு குதிக்காது, காரணம் துணி மிகக் குறைந்த எதிர் விசையினை மட்டுமே சோற்று உருண்டையின் மீது செலுத்தும். ஆகவே, சுடு சோற்றில் நிகழும் ஸ்டார்ச் மூலக்கூறுகள் வெளியேற்றத்தினை புரிந்து கொண்டால் பிளாஸ்டிக் அரிசி என்பது வீண் வதந்தி என்று நீங்களே புரிந்து கொள்வீர்கள்.

என் நட்பு வட்டத்தில் பாலிமர் துறையில், அரிசி, உயிரி நுட்பம், விவசாய துறையில் ஆராய்ச்சிப் பணியில் இருக்கும் பல நண்பர்கள் உள்ளனர். உங்களுக்கு இருக்கும் கேள்விகளை இந்த பதிவில் கேளுங்கள். நிச்சயம் அவர்கள் மூலம் பதிலை பெற்றுத் தருகிறேன்.

குறிப்பு:

ஜப்பானில் சோற்று உருண்டை ஒனிகிரி (Onigiri) என்றழைக்கப்படும். இந்த ஒனிகிரி உருண்டைகள் கையளவு வடிவில் பார்க்க பந்து போல் இருக்கும். இதனோடு காய், மீன், கறீ ஆகியவற்றை தூவினாற் போல் போட்டு கடல் பாசி தாள் கொண்டு சுற்றி சாப்பிடுவார்கள். இந்த உருண்டை எல்லாம் தரையில் போட்டால் நம் ஊர் ரப்பர் பந்து தோற்று போகும். ஆகவே பிளாஸ்டிக் அரிசி அச்சத்தை தூக்கி எறியுங்கள்.

Japan Onigiri (Rice ball)

Japan Onigiri (Rice ball)

Japan Onigiri (Rice ball)

ஜப்பான் ஆரம்பக் கல்வி பாட புத்தகங்கள் -1

“பாடத்திட்டமே சரி இல்லை”, “கணக்கு ஒழுங்காவே சொல்லித் தரமாட்டேன் என்கிறார்கள்”, “ஏ பி சி டி இன்னும் எழுதத் தெரியலை”, “இரண்டு போயம் சரியா சொல்லித் தர மாட்டேங்குறாங்க”, “இத்து போன சிலபஸ்”,

ஜப்பான்காரன பாருங்க தண்ணில ஓடற வண்டி கண்டுபிடிச்சிட்டான், எல்லா வேலையையும் ரோபோட்தான் அங்கு செய்யுதாம்.. அவனுங்க மாதிரி நாமளும் முன்னேறனும். நம்ம ஊர் பாடத்திட்டத்தை அப்டியே தூக்கி எறிஞ்சுட்டு மாத்தனும்... இப்படி நிறைய கூப்பாடுகளை சமீப காலத்தில் கேட்க முடிகிறது..

ஆனால் என்றாவது ஜப்பானிய ஆரம்ப பள்ளிகளில் என்ன சொல்லித் தருகிறார்கள் என்று யோசித்தது உண்டா?

ஜப்பானில் 4 வயதுக்குட்டப்ட்ட பாலர் பள்ளிகளில் தொடங்கி வகுப்பு 1 மாணவர்களுக்கான‌ புத்தகங்களில் முதலில் சொல்லித் தருவது

எப்படி கழிவறையில் ஆய் போவது?

எப்படி பேனா பிடிப்பது?

எப்படி பெரியவர்கள் இருக்கும் அறையில் நுழையும் போது நாம் முன் அனுமதி பெற வேண்டியது?

சாப்பிட்டு முடித்த பின் பள்ளியினை எப்படி சுத்தமாக வைத்துக் கொள்வது?

இப்படிப்பட்ட சமூக கல்வியைத்தான் ஜப்பானிய‌ பிஞ்சுகளின் மனதில் முதலில் விதைக்கிறார்கள், அதனால் நல்ல குடிமகன்களை பெறுகிறார்கள்.

நண்பர்களே, கணக்குகளை ஒரு கால்குலேட்டர் துணை கொண்டு பின்னாளில் போட்டு விடலாம், ஆங்கிலத்தைக் கூட ஒரு டிரான்சிலேட்டர் வசதியுடன் செய்து விடலாம். ஆனால் சமூக கல்வியை அவர்கள் எங்கே கற்க முடியும்?

ஆரம்ப கல்வியை வேறு தளத்தில் நாம் அணுக வேண்டிய நேரம் இது.

சமச்சீர் கல்வி இந்த தளத்தில்தான் துவங்கியது. முளையும் போதே குய்யோ முய்யோ என கத்தியே அதனை கிள்ளி போட்டு விட்டீர்கள்.